தாசெக் குளுகோர் – பினாங்கு மாநில அரசாங்கம், கம்போங் செலாமட்டில் பன்றி வளர்ப்பு நடவடிக்கைகளால் சுங்கை கெரேவில் நீண்ட காலமாக நிலவும் நதி மாசு பிரச்சனையை உயிர்வாயு (Biogas) ஆலை அணுகுமுறையை பின்பற்றுவதன் மூலம் தீர்க்க ஆலோசித்துள்ளது.
இன்று இரண்டு பன்றிப் பண்ணைகள் மற்றும் சுங்கை கெரேவுக்குச் சென்ற மாநில வீட்டுவசதி மற்றும் சுற்றுச்சூழல் ஆட்சிக்குழுத் தலைவர் டத்தோ ஸ்ரீ சுந்தராஜு சோமு, அந்த இடத்தில் மேற்கொள்ளப்பட வேண்டிய இத்தகைய முயற்சியின் அவசரத் தேவையைக் குறிப்பிட்டார்.
“இந்த சுங்கை கெரே நதி மாசுபாடு பிரச்சனை பல ஆண்டுகளாக நடந்து வருகிறது, மேலும் ஒவ்வொரு முறை மாநில சட்டமன்றம் கூடும் போது கூட இவ்விவகாரம் பரபரப்பாக விவாதிக்கப்படுகிறது.
“நாங்கள் இந்த சிக்கலை தீவிரமாகக் கண்காணிக்கின்றோம். மேலும், மாநில சுற்றுச்சூழல் துறை (DOE) மற்றும் மாநில கால்நடைத் துறையை உள்ளடக்கிய அனைத்து தொடர்புடைய நிறுவனங்களும் அந்த இடத்தில் உயிர்வாயு ஆலையை உருவாக்குவதற்கான முன்மொழிவை விவாதிக்க பணிக்கப்பட்டுள்ளன.
“இந்த ஆலை பன்றிக் கழிவுகளை ஆற்றலாக மாற்ற உதவும். இது பொருளாதார வளர்ச்சிக்கு பயனளிக்கும். எனவே, இந்த விஷயத்தை அடுத்த இரண்டு வாரங்களில் மாநில செயற்குழு கூட்டம் மூலம் மாநில அரசின் கவனத்திற்கு கொண்டு செல்வேன்.
“இங்குள்ள உள்ளூர் மக்களை பாதிக்கும் வற்றாத பிரச்சனையை இந்த திட்டத்தால் தீர்க்க முடியும் என்று நான் முழுமையாக நம்புகிறேன்”, என இன்று பன்றி பண்ணைகள் மற்றும் சுங்கை கெரேவை பார்வையிட்ட பின்னர் செய்தியாளர்களிடம் சுந்தராஜு தெரிவித்தார்.
நிபோங் தெபாலில் அமைந்துள்ள கம்போங் வால்டோர் இடத்திலும் இதேபோன்ற ஒரு திட்டத்தை நிர்மாணிப்பதில் ஈடுபட்டுள்ள ஒப்பந்ததாரர்களை கூடிய விரைவில் சந்திப்பதாக சுந்தராஜூ கூறினார்.
“கம்போங் செலாமட்டிலும் இதேபோன்ற முயற்சியில் ஈடுபட அவர்கள் ஆர்வமாக இருக்கிறார்களா என்பதை நான் அவர்களுடன் விவாதிப்பேன்.
“இது ஒரு லாபகரமான முதலீட்டு அணுகுமுறையாகும். மேலும், எங்கள் மதிப்பீட்டிற்கான முன்மொழிவுகளை சமர்ப்பிக்கும் முன் பல தரப்பினரும் இந்த குத்தகை முறையில் பங்கேற்க ஆர்வமாக இருப்பர் என நான் நம்புகிறேன்,” என்று அவர் கூறினார்.
ஆகவே, ஆலோசிக்கப்படும் இத்திட்டம் எல்லாம் சீராக நடந்தால் அடுத்த ஆண்டு இந்த முயற்சியை மேற்கொள்ள முடியும் என அவர் நம்பிக்கை தெரிவித்தார்.
மாநில சுற்றுச்சூழல் இயக்குனர் நோராசிசி ஆதினன் சுங்கை கெரேவில் உள்ள நதி மாசு பிரச்சனைக்கு அருகிலுள்ள குடியிருப்பாளர்களுக்கு விரைவில் தீர்வு வழங்க வேண்டும் என்று ஒப்புக்கொண்டார்.
“ஒவ்வொரு முறையும் நீரை பரிசோதிக்கும் போது நதியின் மாசுக் குறியீடு நிலை மூன்று மற்றும் நான்காவது நிலை வரை இருக்கும். மாசுபாடு மோசமடைவதைத் தடுக்க தேவையான நடவடிக்கை எடுக்க வேண்டும். இதற்கு அனைத்து தரப்பினரும் ஒன்றிணைந்து செயல்பட்டால் விரைவில் இதனை களைய முடியும்,” என்று அவர் கூறினார்.
மாநில கால்நடைத் துறை அதிகாரியான டாக்டர் திஷ்ரின் முஹம்மது இஸ்மாயில், கம்போங் செலாமட்டில் மொத்தம் 61 பன்றிப் பண்ணைகள் உள்ளன என்றார்.
“எங்கள் சோதனைகளின் அடிப்படையில், அனைத்து பண்ணைகளும் கழிவுகளின் வெளியேற்றத்தின் அடிப்படையில் கொடுக்கப்பட்ட வழிகாட்டுதல்களுக்கு இணங்குகின்றன. அனைத்து பண்ணைகளிலும் மொத்தம் 135,000 பன்றிகள் உள்ளன, இதுவரை எந்த மீறல்களும் கண்டறியப்படவில்லை,” என்று அவர் தெளிவுப்படுத்தினார்.