பாகான் ஜெர்மால் – ஜூரு – சுங்கை டுவா உயர்மட்ட நெடுஞ்சாலைத் திட்டத்தை நிர்மாணிப்பதற்கான முன்மொழிவு விரைவில் அமைச்சரவைக் கூட்டத்தில் தாக்கல் செய்யப்படும். இத்திட்டம் ரிம1.8 பில்லியன் நிதி ஒதுக்கீட்டில் நிர்மாணிக்க மதிப்பிடப்படுகிறது.
பொதுப்பணி துறை துணை அமைச்சர் டத்தோஸ்ரீ அஹ்மட் மஸ்லான் கூறுகையில், இந்த நெடுஞ்சாலை 15 கிலோமீட்டர் (கி.மீ) தூரம் அமைக்க உத்தேசிக்கப்பட்டுள்ளது. இத்திட்டம் சரிபார்ப்பு நோக்கங்களுக்காக தேவையான மூன்று செயல்முறை நடவடிக்கைகளின் முதல் பிரிவை கடந்துவிட்டது.
“கடந்த பிப்ரவரியில், வடக்கு-தெற்கு நெடுஞ்சாலை (PLUS) இந்த திட்டத்திற்கான முன்மொழிவு தொடர்பாக பிரதமர் துறையின் பொது தனியார் கூட்டாண்மை பிரிவு (UKAS) இடம் சமர்ப்பிக்கப்பட்டது.
“PLUS மற்றும் UKAS இடையிலான கலந்தாய்வு முடிவடைந்த பிறகு, பொதுப்பணி துறை அமைச்சு இத்திட்டம் குறித்த பரிந்துரை அறிக்கையை அமைச்சரவைக்கு கொண்டு சென்று தீர்மானிக்கப்படும்,” என்று துணை அமைச்சர் பட்டர்வொர்த் அரங்கில் நடைபெற்ற ஜாலான் பண்டார் @ பினாங்கு 2024 கருத்தரங்கில் கலந்து கொண்டு இவ்வாறு தெரிவித்தார்.
இந்த கருத்தரங்கு நிகழ்ச்சியை மாநில முதலமைச்சர் மேதகு சாவ் கொன் இயோவ் தொடங்கி வைத்தார்.
மேலும், பொதுப்பணி துறை (ஜே.கே.ஆர்), சாலை பராமரிப்புக் கிளையின் இயக்குநர் டத்தோ Ir. இப்ராஹிம் ஈசா; மலேசியாவின் சாலைப் பொறியியல் சங்கத்தின் (REAM) தலைவர் டத்தோ Ir. அஹ்மத் ரெட்ஸா குலாம் ரசூல் மற்றும் பினாங்கு மாநகர் கழகம் மேயர் (MBPP), டத்தோ Ir. இராஜேந்திரன் ஆகியோர் கலந்து கொண்டனர்.
இந்த நெடுஞ்சாலைத் திட்டம் பினாங்குக்கு மட்டுமல்ல வட மாநிலங்களில் இருந்து பயணிக்கும் மக்களுக்கும் நீண்ட காலப் பலன்களைத் தரும் என்று அஹ்மட் நம்பிக்கை தெரிவித்தார்.
“முன்னாள் பிரதமர் துன் அப்துல்லா அகமது படாவி அவரது பதவிக்காலத்தில் பினாங்கு இரண்டாம் பாலத் திட்டத்திற்காக நினைவுக் கூறுவது போல, நடப்பு பிரதமர் (டத்தோஸ்ரீ உத்தாமா அன்வார் இப்ராஹிம்) இந்த உயர்மட்ட நெடுஞ்சாலைக்காக நினைவுக் கூறப்படுவார் என்று நம்புகிறேன்.
இந்த திட்டம் வெற்றிகரமாகச் செயல்படுத்தப்பட்டால், பினாங்கு மக்களால் பிரதமர் (அன்வார்) மற்றும் முதலமைச்சர் (சாவ் கொன் இயோவ்) ஆகியோர் நினைவுக் கூறப்படுவர். மேலும், இத்திட்டம் குறித்த ஆய்வும் நிறைவடைந்துள்ளது குறிப்பிடத்தக்கது, என்றார்.
இதனிடையே, கொன் இயோவ் தனது உரையின் போது, இலகு இரயில் போக்குவரத்து (எல்.ஆர்.டி) திட்டம் இந்த ஆண்டின் இறுதியில் தொடங்கப்படும் என்று எதிர்பார்க்கப்படுகிறது. இதை அடுத்து, ஜூரு-சுங்கை டுவா உயர்மட்ட நெடுஞ்சாலை திட்டத்திற்கும் அவர் முன்னுரிமை அளிப்பார், என்றார்.
ஜுரு முதல் சுங்கை டுவா வரையிலான போக்குவரத்து நெரிசல் பிரச்சனையைத் தீர்க்க இந்த நெடுஞ்சாலைத் திட்டத்தின் கட்டுமானம் மிக அவசியமாகும் என்று கொன் இயோவ் கூறினார்.
கடந்த பிப்ரவரியில், புதிய தொழில்துறை பூங்காத் திட்டத்தின் தொடக்க விழாவிற்கு, பெர்மாதாங் பாவிலிருந்து பத்து காவானுக்கு தற்செயலாக பிரதமரை உச்ச நேரத்தில் அழைத்துச் சென்றபோது, இந்த சாலை நெரிசல் பிரச்சனையை அவரால் நேரில் கண்டறிய முடிந்தது.
“இந்த விவகாரம் கடந்த ஏப்ரலில் மீண்டும் எழுப்பப்பட்டது. அதன் பின்னர், ஜே.கே.ஆர் மற்ற நிறுவனங்களுடன் சேர்ந்து சம்பந்தப்பட்ட பகுதியில் ஆய்வு மற்றும் மக்கள் தொகை கணக்கெடுப்பை நடத்தியது,” என்று கூறினார்.
தற்போதுள்ள சீரமைப்பின் மேல் நெடுஞ்சாலை கட்டப்பட்டுள்ளதால், கட்டுமானச் செயல்பாட்டின் போது இத்திட்டம் சில சவால்களை எதிர்கொள்ளக்கூடும் என்று கொன் இயோவ் கூறினார்.
“நாங்கள் எதிர்கொள்ளக்கூடிய சவால்களில் பயன்பாட்டுப் பிரச்சனையும் உள்ளது. மேலும், இந்த நெடுஞ்சாலை ஏற்கனவே உள்ள சீரமைப்பில் கட்டப்படவிருப்பதால், நிலம் கையகப்படுத்தும் பெரிய பிரச்சனை ஏதும் இல்லை. இத்திட்டத்தை செயல்படுத்த பல ஆண்டுகள் ஆகலாம்.,” என்று அவர் கூறினார்.