தேசிய முன்னணியின் கனவு சிதைந்தது; மக்கள் கூட்டணியே மீண்டும் பினாங்கை வென்றது.

மலேசிய வரலாற்றிலேயே மிக ஆவலாக எதிர்பார்க்கப்பட்ட பொதுத் தேர்தல் கடந்த மே ஐந்தாம் திகதி நாடெங்கிலும் நடைபெற்று முடிந்தது. நாடாளுமன்றமும் சட்டமன்றங்களும் கலைக்கப்பட்ட பின் தொடந்து இரண்டு வாரங்களுக்கு அனல் பறக்கும் தேர்ந்தல் பரப்புரைகள் நாடு முழுவதும் நடைபெற்றன. மக்களை ஏக வண்ணம் கவரும் வகையில் மக்கள் நலனை முன்னிறுத்தி ஒவ்வொரு  கட்சியும் தங்கள் தேர்தல் கொள்கை அறிக்கைகளைத் தயாரித்திருந்தன. அவ்வகையில், வரலாறு காணாத அளவிற்கு மிகவும் பரபரப்பை ஏற்படுத்திய நாட்டின் 13ஆவது தேர்தலில் மீண்டும் தேசிய முன்னணியே வெற்றி வாகை சூடியது. நாட்டின் 222 நாடாளுமன்றத் தொகுதிகளில் 133 தொகுதிகளைக் கைப்பற்றி ஆட்சி அமைத்தது. கடந்த பொதுத் தேர்தலைக் காட்டிலும் இம்முறை தேசிய முன்னணி பின்னடைவை எதிர்நோக்கியிருந்தாலும் மக்கள் ஆதரவை அதிகம் பெற்றிருந்த மக்கள் கூட்டணியைக் குறுகிய பெரும்பான்மையில் வென்றுள்ளது இங்கு குறிப்பிடத்தக்கது.

இதற்கிடையில், ஜனநாயக செயல்கட்சியின். கோட்டையாகத் திகழும்  பினாங்கு மாநிலத்தைக் கைப்பற்ற தேசிய முன்னணி பல்வேறு முயற்சிகளை எடுத்தும் அது பலனளிக்காமலே போனது. பினாங்கு மாநிலத்தின் 40 சட்டமன்றங்களில் 30 சட்டமன்றங்களை மக்கள் கூட்டணி மூன்றில் இரண்டு பெரும்பான்மையில் வென்று ஆட்சி அமைத்தது. தேசிய முன்னணி வெறும் 10 சட்டமன்றங்களையே கைப்பற்ற முடிந்தது. மேலும், 13 நாடாளுமன்றத் தொகுதிகளில் மக்கள் கூட்டணி 10 தொகுதிகளும் தேசிய முன்னணி 3 தொகுதிகளும் வென்றன. ஜனநாயக செயல்கட்சி போட்டியிட்ட 19 சட்டமன்றத் தொகுதிகளிலும் வெற்றி பெற்றுச் சாதனை படைத்துள்ளது. இம்முறை ஜனநாயக செயல்கட்சி பல புதிய முகங்களை அறிமுகம் செய்த போதிலும் அதிக பெரும்பான்மையில் வெற்றி பெற்றுப் பினாங்கு மாநிலம் தங்களின் அசைக்க முடியாத கோட்டை என்பதை நிரூபித்துள்ளனர்.

தேர்தல் பரப்புரை காலக்கட்டத்தில் மக்கள் கூட்டணியின் தேர்தல் பரப்புரைக் கூட்டத்திற்குதான் அமோக வரவேற்பு கிடைத்தது எனலாம். ஏப்ரல் 29ஆம் திகதி ஹன் சியாங் கல்லூரித் திடலில் நடைபெற்ற கூட்டத்திற்கு ஏறக்குறைய 70,000 மக்கள் கூட்டமும், மே 3ஆம் திகதி பாடாங் கோத்தாவில் நடைபெற்ற கூட்டத்திற்கு ஏறத்தாழ 120,000 மக்கள் கூட்டமும் ஒன்று சேர்ந்து மக்கள் கூட்டணியின் வலிமையைப் பிரதிபலித்தது. மேலும், இக்கூட்டத்தில் கலந்து கொண்டவர்கள் ஜனநாயக செயல் கட்சிக்குக் கணிசமான ரொக்கப் பணத்தை நன்கொடையாக வழங்கினர். மொத்தம் ஏறக்குறைய 800,000 ரிங்கிட் நன்கொடை வசூலிக்கப்பட்டது இங்கு குறிப்பிடத்தக்கது. அதுமட்டுமன்றி, ஜனநாயக செயல்கட்சியின் சின்னம் கொண்ட சட்டைகள், பொம்மைகள், தொப்பிகள், அலங்கரிப்புப் பொருட்களையும் மக்கள் அதிகமாக வாங்கி ஆதரவு வழங்கினர். ஒரு புறம் அனைத்தும் இலவசமாகக் கிடைத்தும், பணம் கொடுத்து வாங்கும் மக்களின் செயல்பாடு அக்கட்சியின் மேல் கொண்ட நம்பிக்கையைப் பிரதிபலிக்கிறது என்றால் அது மிகையாகாது.

கடந்த ஐந்தாண்டுகளில் மக்கள் கூட்டணி ஆட்சியின் கீழ் செயல்பட்ட பினாங்கு மாநிலத்தின் வளர்ச்சியையும் மேம்பாட்டினையும் கருத்தில் கொண்டே பினாங்கு வாழ் மக்கள் இவ்வளர்ச்சி தொடர வேண்டும் என்று ஆட்சி பீடத்தில் அமரும் அதிகாரத்தை மீண்டும் மக்கள் கூட்டணிக்கே வழங்கியுள்ளனர். மக்கள் தீர்ப்பே மகேசன் தீர்ப்பு என்ற அடிப்படையில் பினாங்கு மக்கள் பண அரசியலைப் புறக்கணித்து மிகச் சரியான முடிவையே எடுத்துள்ளனர் என்றே கூற வேண்டும். பினாங்கு மாநிலத்தின் பொதுத் தேர்தல் முடிவுகள் பின்வருமாறு:

நாடாளுமன்றத் தொகுதிகளும் அதன் சட்டமன்றத் தொகுதிகளும்